Пра што вар­та ве­даць да­рос­лым і аб чым па­пя­рэ­дзіць дзя­цей на­пя­рэ­дад­ні ку­паль­на­га се­зо­на (газета "Звязда")

Як паведамілі пасля ў Таварыстве ратавання на водах, дзевяцікласнік паехаў на веласіпедзе з сябрам пакупацца, але хлопцы не знайшлі прыдатнага месца для заходу ў ваду і вырашылі вярнуцца дадому. Па дарозе падлеткі пасварыліся і раз’ехаліся. Крыху пазней маці аднаго са школьнікаў пачала турбавацца, бо ён не вярнуўся дадому. Яна патэлефанавала сыну, але тэлефон ніхто не падняў. Тады жанчына адправіла старэйшага сына і яго сябра на пошукі. Хлопцы знайшлі веласіпед дзевяцікласніка і яго асабістыя рэчы каля дарогі насупраць тэхнічнага вадаёма, у якім і патануў падлетак. На месца здарэння былі выкліканы ратавальнікі.

Будзьце прыкладам для сваіх дзяцей

Яшчэ адзін трагічны выпадак здарыўся ў Слуцкім раёне. 2 мая ў вёсцы Казловічы бацькі 14-гадовага хлопца заўважылі адсутнасць падлетка і прыняліся яго шукаць. Пошукавыя мерапрыемствы, у якіх сумесна з ратавальнікамі ўдзельнічалі праваахоўныя органы, працягваліся амаль шэсць гадзін. На беразе вадаёма, які знаходзіцца паблізу вёскі, былі знойдзены вопратка падлетка і яго веласіпед. Супрацоўнікі дасталі цела непаўналетняга з вады без прыкмет жыцця. Вадаём з’яўляецца тэхнічным і не прызначаны для купання.

Як звяртае ўвагу афіцыйны прадстаўнік Мінскага абласнога ўпраўлення МНС Анастасія Швайбовіч, менавіта падлеткі часам паводзяць сябе занадта бестурботна, самаўпэўнена, бегаюць і песцяцца каля вады, не адчуваючы ніякай небяспекі. «Бацькі павінны разумець, што, колькі б ні было гадоў дзіцяці (дашкольнік гэта ці навучэнец), яно не павінна знаходзіцца каля вады без нагляду дарослых, — падкрэслівае яна. — І менавіта бацькі абавязаны пагаварыць з дзецьмі аб усім, што можа адбыцца; папярэдзіць аб небяспецы і растлумачыць наступствы».

Па-першае, для купання варта выбіраць толькі спецыяльна абсталяваныя месцы, бо там дзяжураць ратавальнікі. Па-другое, ні ў якім разе не адпускайце дзяцей на вадаём адных, маленькіх дзяцей трымайце на адлегласці выцягнутай рукі. Па-трэцяе, растлумачце падлеткам, чаму небяспечна ныраць у ваду з вышыні, у невядомых месцах: можна стукнуцца галавой аб грунт, зламаць шыйныя пазванкі, страціць прытомнасць і загінуць. Не менш небяспечна таксама ныраць у ваду з мастоў, плытоў, прыстаняў, дамбаў, іншых збудаванняў. Пад вадой могуць быць, напрыклад, камяні або іншыя небяспечныя прадметы. 

І самае галоўнае, дарослым важна не забываць — дзеці капіруюць іх паводзіны. Таму выконвайце правілы бяспекі самі.

Адкрыццё купальнага сезона магло скончыцца трагічным выпадкам і ў Лепелі. Вечарам 4 мая ратавальнікі выехалі да ракі Ула: паступіла паведамленне аб тым, што тоне дзіця. Калі супрацоўнікі МНС прыехалі да месца здарэння, падлетак знаходзіўся за дзесяць метраў ад супрацьлеглага берага ракі і трымаўся за галіны паваленага дрэва. Ратавальнікі Іван Конкін і Віталь Жыветаў пры дапамозе ратавальнай дошкі даплылі да хлопчыка, даставілі яго на бераг і перадалі супрацоўнікам хуткай медыцынскай дапамогі.

Як потым высветлілася, кампанія хлопчыкаў і дзяўчынак вырашыла адкрыць купальны сезон. Раптам падлетак 2011 года нараджэння пачаў тануць. Адзін з яго таварышаў кінуўся на дапамогу, але падплысці да сябра яму замінала плынь. У гэты час дзіця, якое танула, аднесла да супрацьлеглага берага, дзе яно і знаходзілася да прыезду ратавальнікаў. На шчасце, здароўю пацярпелага нічога не пагражала.

Дарэчы, небяспеку для дзяцей, асабліва малых, уяўляюць не толькі буйныя вадаёмы, але і дэкаратыўныя сажалкі, басейны і нават ёмістасці з вадой. Толькі бацькі, якія ведаюць пра магчымыя небяспекі і ўспрымаюць іх сур’ёзна, якімі рэдкімі і неверагоднымі яны не здаваліся б, змогуць зберагчы сваё дзіця ад бяды.

Знаходзячыся з дзецьмі каля вады, пільнасць нельга губляць ні на хвіліну. Аб гэтым сведчыць трагічны выпадак, які здарыўся днём 25 чэрвеня мінулага года на тэрыторыі прыватнага дома ў Мінскім раёне. Як высветлілася, увесь дзень шматдзетная сям’я займалася будоўляй, у пэўны момант дзіця знікла з поля зроку бацькоў. Заўважыўшы адсутнасць дзяўчынкі, бацька з маці сталі яе шукаць. Паўтарагадовае дзіця знайшлі ў каркасным басейне: дачка была ўжо без прыкмет жыцця. Басейн быў абсталяваны лесвіцай, па якой і змагло самастойна забрацца дзіця.

Уважлівасць і выкананне правіл

Што датычыцца дарослых, якія становяцца ахвярамі вады, то прычыны трагедый, як правіла, — бестурботнасць грамадзян і парушэнне правіл паводзін на вадзе. 

У большасці выпадкаў надзвычайныя здарэнні адбываюцца падчас распівання спіртных напояў, пры заплыве ў нецвярозым стане, купанні ў забароненых месцах, дзе няма ратавальных станцый. Ужыванне алкаголю і адпачынак каля вады часта становяцца прычынай гібелі людзей. Купацца ў вадаёме ў стане алкагольнага ап’янення — небяспечна для жыцця.

— Тонуць у асноўным працаздольныя людзі, якія, як правіла, не ўжываюць спіртныя напоі, — звяртае ўвагу афіцыйны прадстаўнік Міністэрства па надзвычайных сітуацыях Яўген Бараноўскі. — Адпачываючы на пляжы, крыху выпіваюць — адпаведна, узнікаюць пэўныя праблемы. Гэта могуць быць як фізіялагічныя працэсы (сэрца, сутаргі), так і няўважлівасць, калі чалавек заплыў далёка, не разлічыў сілы і не здолеў вярнуцца назад. Такім чынам, людзі становяцца ахвярай у першую чаргу ўласнай бяспечнасці.

Ратавальнікі рэкамендуюць ацэньваць свае сілы падчас плавання, не плыць на спрэчку. Нярэдка нават тыя, хто ўмее добра плаваць, заплываюць на глыбіню, а вярнуцца на бераг ужо не хапае сіл. Не варта забываць аб бяспецы, калі вы адпраўляецеся на шпацыр на лодцы, катэры, гідрацыкле: самае галоўнае правіла — надзець выратавальную камізэльку. Нельга перавышаць устаноўленую колькасць людзей на борце, кіраваць плаўсродкамі ў стане алкагольнага ап’янення, сядзець на бартах, пераходзіць з месца на месца і перасаджвацца на іншыя катэры, лодкі; выходзіць на ваду на плаўсродках, зусім для гэтага не прыстасаваных.

Вельмі часта пры адпачынку на вадзе людзі выкарыстоўваюць розныя надзіманыя прадметы. Плаваць на іх небяспечна, а для чалавека, які не ўмее плаваць, — увогуле трагічна. Надзіманыя камеры, матрацы вельмі лёгкія, нават слабага ветру і плыні дастаткова, каб аднесці іх на вялікія адлегласці. Варта адцягнуць увагу на некалькі хвілін — і бераг аказваецца па-за межамі дасягальнасці. Матрац можа захліснуць хваляй, ён можа выслізнуць з-пад плыўца і накрыць яго з галавой.

Па словах Яўгена Бараноўскага, неабходна выбіраць спецыяльна абсталяваныя месцы для купання — тыя, дзе ёсць уся неабходная інфраструктура; дзе дзяжураць ратавальнікі Таварыства ратавання на водах. «Больш за тое, у купальным сезоне мы будзем узмацняць свае сілы: на пляжах дадаткова будуць дзяжурыць няштатныя плыўцы-ратавальнікі з ліку супрацоўнікаў МНС, якія таксама будуць знаходзяцца ў зонах адпачынку для таго, каб своечасова прыйсці на дапамогу тым, хто трапіў у бяду, — канстатаваў ён. — Непасрэдна каля прыбярэжнай тэрыторыі будуць шырока праводзіцца прафілактычныя акцыі. Станем хадзіць не толькі па месцах, дзе дазволена купацца, а і там, дзе гэта забаронена. Сёння мясцовымі органамі ўлады робіцца важная вялікая работа для таго, каб павялічвалася колькасць дазволеных пляжаў. Думаю, у пачатку чэрвеня мы арганізуем інтэрактыўную карту дазволеных пляжаў. Абавязкова ўсім пакажам і раскажам, дзе купацца можна і бяспечна, дзе рызыка зніжана, дзе ёсць уся неабходная інфраструктура для добрага і бяспечнага адпачынку».

Што рабіць, калі сталі відавочцам таго, што нехта тоне:

• паклічце на дапамогу іншых людзей або ратавальнікаў Таварыства ратавання на водах, калі тыя ёсць побач;
• патэлефануйце па тэлефоне МНС 112 і выклічце хуткую дапамогу па тэлефоне 103;
• кіньце таму, хто тоне, ратавальны круг або доўгую вяроўку з вузлом на канцы (калі яны ёсць);
• калі ёсць лодка, падплывіце да чалавека і паспрабуйце дапамагчы;
• калі вы добра плаваеце і ўпэўнены ў сваіх сілах, паспрабуйце дабрацца да чалавека самастойна: абхапіце яго ззаду за плечы і паспрабуйце пазбегнуць спроб ухапіцца за вас, плывіце з ім назад;
• калі ж тапелец без прытомнасці, цягніце яго да берага, узяўшы рукой пад падбародак такім чынам, каб яго твар увесь час знаходзіўся над паверхняй вады, а пры першай магчымасці прыступіце да аказання першай медыцынскай дапамогі.

Вераніка КАНЮТА

Фота з адкрытых крыніц

Загаловак у газеце: Асця­рож­на, вада!

Ко всем новостям Минской области Версия для печати Назад

Facebook

Вконтакте

Instagram

Youtube

Telegram

Одноклассники

Viber

Помощь рядом

Яндекс.Дзен

Tiktok

Подписывайтесь на нас