Канешне, мы не проста так звярнуліся да такога параўнання – вельмі часта наша абыякавасць, наша саманадзеянасць прыводзяць да невыпраўнага – да трагедый, у лік якіх уваходзяць, дарэчы, і пажары. На жаль, значная частка насельніцтва працягвае лічыць, што “у жыцці галоўнае - утульнасць, а бяспека – гэта пытанне другое”. А вось ратавальнікі не пагаджаюцца з такой думкай і імкнуцца зрабіць усё магчымае, каб вогненных трагедый было як мага менш…

Менавіта з мэтай папярэджання пажараў у жылым фондзе работнікі Стаўбцоўскага раённага аддзела па надзвычайных сітуацыях працягваюць прафілактычную работу з насельніцтвам па месцы жыхарства. Асаблівую ратавальнікі скіроўваюць на домаўладанні, у якіх пражываюць пенсіянеры, сем'і, якія выхоўваюць непаўналетніх дзяцей, грамадзяне, што злоўжываюць алкагольнымі напоямі. На гэты раз да прафілактычных мерапрыемстваў на тэрыторыі Мікалаеўшчынскага сельвыканкама ў рамках акцыі “За бяспеку разам!” далучыліся і карэспандэнты раённай газеты, і работнікі Стаўбцоўскага МРА ДУ "Дзяржэнергагазнадзор”, і, канешне, сам старшыня сельвыканкама.

Падчас правядзення аглядаў дамоў і кватэр гаспадарам нагадваюць, да якіх трагічных наступстваў могуць прывесці парушэнні правілаў пажарнай бяспекі, прыводзяць прыклады рэальных пажараў з ахвярамі. Нагадваюць уладальнікам жылля і пра правілы эксплуатацыі пячнога ацяплення і электрычных прыбораў, папярэджваюць аб небяспецы пакідання малых дзяцей без нагляду, рызыках курэння ў жыллі, асабліва пасля ўжывання алкаголю. Не пакідаюць без увагі і пытанне ўстаноўкі ў памяшканнях аўтаномных пажарных апавяшчальнікаў.

Традыцыйна, акрамя парад па выпраўленні выяўленных парушэнняў правілаў пажарнай бяспекі, кожны ўдзельнік прафілактычнага мерапрыемства атрымаў тэматычныя памяткі або лістоўкі.

А вось на тэрыторыі Старасвержанскага сельвыканкама быў праведзены сход грамадзян, на якім з пытаннямі па пажарнай бяспецы выступіў начальнік Стаўбцоўскага райаддзела па надзвычайных сітуацыях Андрэй Герасіменка.

– Мы ўжо не адзін раз адзначалі, што галоўная прычына вогненных здарэнняў – чалавечая абыякавасць, - адзначыў Андрэй Сцяпанавіч. – Печка сама гарэць не будзе, электрапрыборы не самі сабой ўключаюцца, а цыгарэта не падыйдзе да запалкі з прапановай “прыкурыць”. Менавіта кожны з нас сам сваімі дзеяннямі стварае вакол сябе бяспечныя або небяспечныя ўмовы. Да, ратавальнікі наведваюць домаўладанні, даюць парады, а вось прымаць рашэнне – і абавязкова правільнае рашэнне - павінны самі гаспадары!