- Адреса и телефоны
-
220137 г. Минск, ул.Нестерова, 9а
Время работы: пн-пт 09.00-18.00
- (+375 17) 246-74-04 (приемная)
- (+375 17) 273-39-99, (+375 17) 273-93-65
- minobl@mchs.gov.by
Ртуць – вельмі небяспечная! (Мядзельскі раён)
Сёння металічная ртуць шырока прымяняецца ў быце і ў прамысловай вытворчасці. Часам мы нават не здумваемся над тым, якую небяспеку тоіць неакуратнае абыходжанне з прыборамі, якія яе ўтрымліваюць. Увогуле ртуць – моцны яд, згубнае ўздзеянне якога праяўляецца не адразу. Пары і злучэнні яе здольны накоплівацца ў нырках, печані, сардэчнай мышцы, мозгу, страўніку. Яны пашкоджваюць клеткавыя мембраны, зніжаюць актыўнасць ферментаў. Асабліва ўспрымальныя да дзеянняў пары ртуці дзеці. Аказваецца, нават 2 грамы небяспечнага рэчыва, раскаціўшыся па аднапакаёвай кватэры з тэрмометра, які разбіўся, павялічваюць гранічна дапушчальную канцэнтрацыю пароў у два разы.
Што ж рабіць, калі ўсё ж маленькія кропелькі ртуці аказаліся на падлозе? Па – першае, уключыце настольную лямпу – серабрыстыя кропелькі будуць бачны як на ладоні. Па – другое, надзеньце гумовыя пальчаткі, абараніце органы дыхання хаця б вільготнай марлявай павязкай. Нельга выціраць ртуць анучай – гэта прывядзе да яе размывання і павелічэння паверхні выпарэння. Не збірайце яе пыласосам і венікам, не выкідвайце ва ўнітаз. Для збору шкоднага рэчыва неабходна прыгатаваць напоўнены вадой слоік са шчыльнай накрыўкай, звычайны валасяны пэнзлік, гумовую грушу, папяровы канверцік, лейкапластыр, мокрую газету, анучу, раствор марганцоўкі ці мыльна – содавы. З дапамогай пэнзліка трэба сабраць самыя буйныя шарыкі ў папяровы канверцік. Затым у гумовую грушу неабходна ўцягнуць больш дробныя кропелькі, а астатнія “наклеіць” на лейкапластыр. Сабраную ртуць змясціць у слоік і шчыльна яго закрыць. Ачышчаную паверхню патрэбна працерці мокрай газетай і апрацаваць прыгатаваным растворам, праветрыць памяшканне. Далейшы лёс сабранай ртуці падскажа дыспетчар МНС па нумары 112.