Калі пайшлі ў лес і заблукалі… (Мядзельскі раён).

Зусім хутка пачнецца любімы многімі сезон "ціхага палявання". Але не заўсёды паходы ў лес складваюцца ўдала. Нагадаю адзін з выпадкаў, які здарыўся на тэрыторыі Мядзельскага раёна ў мінулым годзе.

Пачалося ўсё з таго, што пенсіянерка з курортнага пасёлка Нарач удзень 14 кастрычніка пайшла ў лес за ягадамі і заблукала. Калі стала цямнець, патэлефанавала ў міліцыю. Адтуль інфармацыя аб тым, што патрабуецца дапамога ў пошуку чалавека каля вёскі Чарэмшыцы, паступіла у цэнтр аператыўнага кіравання раённага аддзела па надзвычайных сітуацыях. На месца выехалі работнікі пажарнага аварыйна – выратавальнага паста вёскі Занарач, а таксама пошукава – выратавальная група абласнога ўпраўлення МНС. Выратавальнікі шукалі жанчыну разам з супрацоўнікамі міліцыі. Падавалі сігналы спецыяльным гучнагаварыльным прыстасаваннем. У пенсіянеркі з сабой быў мабільны тэлефон, і дыспетчар райаддзела адначасова размаўляў з ёй.

Жанчына выйшла на сігнал, адчувала сябе добра і ў медыцынскай дапамозе патрэбы не мела.

Каб не папасці ў такую сітуацыю, неабходна ведаць і памятаць, як паводзіць сябе падчас паходу ў лясны масіў. Пра гэта раскажа намеснік начальніка Мядзельскага раённага аддзела па надзвычайных сітуацыях па аператыўна- тактычнай рабоце Андрэй Аляксандравіч Матняк.

– Для таго, каб не прымусіць хвалявацца родных і блізкіх, неабходна перад паходам ў лес абмеркаваць з імі маршрут і час вяртання. Рэкамендуюць надзець на шыю свісток і папоўніць баланс сотавага тэлефона, а таксама праверыць зарад батарэі. Вазьміце з сабой запалкі, нож, невялікі запас прадуктаў і вады. Тым, хто пастаянна карыстаецца лекамі, трэба мець іх пры сабе.

Каб павысіць верагоднасць пошукавых работ, лепш апрануць яркае адзенне. Для гэтага лепш падыйдуць рудыя, чырвоныя, жоўтыя, белыя курткі, а вось камуфляжы апранаць не рэкамендую – вас могуць не ўбачыць і з трох метраў.

Старайцеся запамінаць па шляху як мага больш прадметаў: нейкія незвычайныя дрэвы, камяні… Тады будзе прасцей вяртацца да зыходнай пазіцыі.

Калі ўсё ж здарылася так, што вы заблукалі, галоўнае правіла не панікаваць. Спыніцеся і падумайце: адкуль прыйшлі, ці не чуваць крыкаў, шуму машын, брэху сабак – гэта можа стаць знакам таго, што побач знаходзіцца населены пункт. Калі дакладна ведаеце, што вас будуць шукаць – заставайцеся на месцы, развядзіце вогнішча: па дыме знайсці чалавека прасцей. А вось калі рашылі шукаць дарогу самі, старайцеся не пятляць, арыентуйцеся па сонцы. Вельмі добра, калі ўдалося выйсці на лінію электраперадач, чыгунку, газапровад, раку: ідучы ўздоўж гэтых аб’ектаў, заўсёды выйдзеце да людзей, хай і не там, дзе меркавалі.

Калі знайшлі ў лесе сцежку, вызначце спачатку, ці не звярыная яна. А зрабіць гэта можна проста – калі галінкі раз – пораз б’юць вам у твар і грудзі, гэта значыць, што дарожку пратапталі “мясцовыя жыхары”. Неадкладна сыдзіце з яе: сустракацца з ляснымі насельнікамі небяспечна.

Калі ўсё ж ноч заспела вас у лесе, падбярыце месца для начлегу. Рухацца ў цёмны час не рэкамендуецца. Месца для начлегу павінна быць высокае і сухое, пажадана ля вялікага дрэва. Нарыхтуйце галлё для вогнішча, зрабіце подсціл з лапак. Размясціцца лепш за ўсё плячыма да дрэва, перад сабой распаліць вогнішча і падтрымліваць яго ўсю ноч.